Pri la paca ŝipo

Vortoj de juda Israelano pri la "Paca Ŝipo"

La propagando de la Islamanoj kaj maldekstruloj en la mondo distordas la veron. Kredu al mi. Mi estas maldekstrulo kaj subtenas la paciĝon inter ni kaj la palestinanoj. Mi estas inter tiuj israelaj judoj, kiuj pretas redoni al ili la teritoriojn okupatajn, rekompence al paco vera kaj sekura. Sed ĉi-foje, pri la afero de la ŝipo, mi deklaras ke Israelo centprocente pravis kaj ke la alia flanko estas krimuloj kaj mensoguloj.
Jen la faktoj:
- Israelo forlasis Gaza-strion komplete antaŭ kelkaj jaroj, kaj tiam restis tie la palestina reĝimo. Sed Ĥamas, la ekstremaj Islamanoj (kiuj ne akceptas la ekzistadon de Israelo, pro Islamaj religiaj kaŭzoj), ekprenis tie perforte la reĝimon kaj komencis pafi misilojn je niaj loĝlokoj. Tial Israelo devis blokadi la transiron de ŝipoj al la haveno de Gaza, por defendi sin kaj ne ebligi alvenon de armiloj.
(ĉu la blokado estas bona aŭ superflua, mi ne scias. Sed ne tio estas nun la demando)
- Israelo ebligas konstante liveron de manĝaĵoj, medikamentoj ktp al Gaza per la surfaco (tero) kaj multaj kamionoj transportas tien manĝaĵojn ktp ĉiutage. Do, nepre ne ekzistas malsato tie. Mizero jes, sed ne malsato.
- La 6 ŝipoj portis lundon varojn, kiujn Israelo pretis akcepti de ili kaj tuj transdoni al la Gazanoj pere de la tero, ne per la maro. Israelo ne akceptis rompon de la blokado. Mi ripetas: Israelo diris al la organizantoj de la ŝipkaravano, ke ĝi pretas akcepti ilin en la isr. haveno Ashdod kaj poste pluporti al la palestinanoj de Gaza la elŝipigitajn varojn (post kontrolo, ke ne estas inter ili armiloj).
- La organizantoj de la ŝiparo ne akceptis tiun ĉi proponon ĉar ili deziris (1) rompi la blokadon kaj (2) krei tutmondan amaskomunikilan efekton. Tiuj ĉi estis iliaj solaj celoj, kompreneble.
- Sur la ĉefa ŝipo estis dekoj da turkaj viroj, armitaj per feraj bastonegoj, feraj ĉenoj kaj diversaj aliaj malvarmaj armiloj, kaj eĉ per revolveroj (almenaŭ unu). Ili ricevis monon de la organizantoj por batali kontraŭ la isr. soldatoj, kiuj venos sur la ŝipon. (10,000 $ por homo. Oni trovis tion poste en iliaj poŝoj)
Mi ne parolas nun pri la pacaktivuloj de diversaj landoj sed pri la turkaj viroj.
- Kiam alvenis la aliaj 5 ŝipoj, niaj soldatoj suriris ilin kaj senprobleme kaj pace turnis ilin al Ashdod. Tie ne okazis violento ĉar tie ne troviĝis tiuj turkaj ekstremaj viroj. La fakto estas ke sur tiuj 5 ŝipoj niaj soldatoj ne pafis. Tute ne.
- Sed kiam niaj soldatoj venis al la granda ŝipo, la turkaj viroj komencis ataki ilin brutale, preskaŭ mortigis kelkajn el ili kaj eĉ kaptis 3 soldatojn kaj prenis ilin suben.
Daŭris iom da tempo por venki tiun ĉi grupon de turkoj. Niaj soldatoj pafis nur por defendi sin kaj nur kiam estis vera danĝero por ilia vivo. Komprenu: temas pri la plej bona armea trupo nia ("KOMANDO"), kiuj estas la plej altkvalitaj homoj, kiuj estas edukitaj agi nur morale kaj ne uzi armilojn se ne estas vera vivdanĝero.
Grave: niaj soldatoj estis surprizitaj ne sciante ke sur la ŝipo atendas ilin tiuj turkaj pagitaj agresantoj (=grandega fuŝo de la israelaj sekurecaj servoj, kompreneble)
Poste oni trovis filmojn faritajn per la fotiloj de la ŝipo mem, kiuj montras kiel la turkoj atendas niajn soldatojn kun la armiloj enmane kaj kiel ili poste atakas ilin.
Se la sama afero okazus en alia lando, la soldatoj tuj pafus kaj mortigus dekojn de la atakantoj. Sed la isr. soldatoj kondutas alimaniere.
- Ĉiuj postaj akuzoj kontraŭ niaj soldatoj estas mensogaj. La fantaziemo de la araboj kaj turkoj estas konata al la tuta mondo kaj se iu kredas al ili, li estas plene naiva.
- Oni povas akuzi Israelon pro la blokado. Mi pri tio ne havas fortan opinion kaj mi vere ne scias ĉu ĝi estas bezonata (multaj diras ke se ne okazos la blokado, Gaza fariĝos arsenalo de armiloj direktotaj kontraŭ Israelo). Sed akuzi Israelon pro la atako de la granda ŝipo, tio estas nehonesta afero. Neniu ŝtato en la mondo kondutus pli bone. Male, mi estas certa ke aliaj armeoj agus multege pli forte kontraŭ la turkaj viroj, kies celo estis klara: mortigi la surŝipiĝontajn soldatojn.
Komprenu: niaj soldatoj venis por pace preni la ŝipon kaj gvidi ĝin al la isr. haveno Ashdod. Sed atendis ilin agreso vivminaca de dekoj da krimuloj.
Mi deklaras ke mi spektis televidon kaj legis gazetojn kaj Interretajn novaĵojn dum multegaj horoj ekde lundo, kaj ĉio, kion mi skribas al vi nun estas nur la vero!
La mondo akuzas nin, la la pacaktivuloj akuzas nin. Preskaŭ ĉiuj akuzas nin. Sed ni neniel mortigas homojn vane. Ni agas demokratie. Nepre. Kial ili ne akuzas 70 procentojn de la ŝtatoj de la mondo, kiuj agas maldemokratie, mortigas senkulpulojn, faras masakrojn (Rusoj en Ĉeĉenio; masakrofarantoj en kelkaj lokoj de Afriko; Ĉinio la diktatura, kiu malobservas la homajn rajtojn kaj mortigas multajn homojn; ktp ktp). Kial nur Israelo troviĝas ĉiam en la unua loko de la atakitoj? Fakte ĝi estas la sola ŝtato atakata de la plimulto de la amaskomunikiloj. Ĉiuj timas de la araboj kaj Islamanoj. Pro tio oni kulpigas Israelon. Oni ne kulpigas Iranon pro la tie okazantaj diktaturaj agoj. Oni ne kulpigas Ĥamas kaj aliajn ekstremajn islamajn registarojn pro tio, kion ili faras al la liberaluloj kaj eĉ al la simpla popolo (al virinoj, gejoj ktp). Nur Israelo troviĝas ĉiam en la centro, daŭre atakata.

Resume (pri la ŝipa afero): Israelo anticipe pretis ricevi la varojn kaj pluporti ilin al Gaza (kion ĝi fakte faris post la kapto de la ŝipoj). La "Pacaktivuloj" ne konsentis por tio (kial?...). Israelaj soldatoj tute ne atakis la homojn sur la 5 ŝipetoj sed devis pafi la turkajn agresantojn, kiuj atendis ilin sur la granda ŝipo kun la intenco kaj kun veraj klopodoj mortigi ilin.


Josi Shemer
Israeol